Ah wis oan Newcraighall Strike Committee
A single mither wi next tae zero
Gied us a fiver oot o her giro
Men gied us free beer fae Dryborough Brewery.
The right tae work, that wis aa that we asked
Demands which the Tories said went too faur
Fir tellys, holidays, mibbes a caur
Sae judges an lawyers taen us tae task.
Ah wis dragged through the courts, heavily fined
An haen nae previous wis nae defence
Fined twa hunner pound fir a first offence
Aa ah did wis staun oan a picket line.
Ah’ll nevvir forget it, it’s left its mark,
It festers there yet, somewhaur in the daurk.
They taen the Kelloholm weans doun the street,
Twa, three wee anes frae the Nursery Schuil,
A jaunt tae the shops, social learnin skills,
Wi mibbes ice-cream thrown in fir a treat.
Ower the brig, across the swollen Nith,
‘Keep in you pair, mind haud each ither’s hauns!’
Wide-eyed the weans tak in the warld’s oan-gauns;
Ane spys some men wha’re thrang up oan a ruif,
An innocently daels her Joker caird,
Lik a fledglin bird bent oan kennin why,
She luiks up an she speirs ‘Miss, whit’s gaun oan?’
Distrackitly, her teacher maks repone;
‘Ah dout they must be pittin up the ‘SKY’’.
Dumfounert wi wunner, the wean juist stared.
Aince ‘Tattie’ Crisp hud left the N.H.S.
Up tae its lugs, a billion pound in debt,
Wis he repentant walkin oot the yett?
Nae fear! Whit did he care anent the mess?
A pension, worth three million, his reward.
A knighthood tae, they say, fir Guid Sir Nigel,
Whae’s no averse it seems tae bein laid idle –
His future ‘index-linked’ – bi closin wards.
But hou hae aa the kettle-bilers fared,
The yins at the ‘shit-face’, whit did they get?
Juist let me illustrate hou things are shared;
Thon lass, wi nae seeck-time, whit did she net? –
A box o Cadbury’s Heroes – an a caird.
Ah lauched when ah heard – else ah micht hae gret.