Read Raw Ltd


Promoting Creative Writing in Scotland


Robert Tannahill















Poems and Songs




Tannahill Home



The Snowstorm


Air,— “Fingal's Lamentation.”


“Wild drives the bitter northern blast,
Fierce whirling wide the crispy snaw,
Young lassie, turn your wand'ring steps,
For e'ening's gloom begins to fa :
I'll tak you to my faither's ha,
An shiel you frae the wintry air,
For, wand'rin thro the driftin snaw,
I fear ye'll sink to rise nae mair.”


“Ah ! gentle lady, airt my way
Across this langsome, lanely moor,
For he wha's dearest to my heart,
Now waits me on the western shore ;
Wi morn he spreads his outward sail—
This nicht I vow'd to meet him there,
To tak ae secret, fond fareweel,
We maybe pairt to meet nae mair.”


“Dear lassie, turn—twill be your deid !
The dreary waste lies far an wide ;
Abide till morn, an then ye'll hae
My faither's herdboy for your guide.”
“Na, lady—na ! I maunna turn,
Impatient love now chides my stay,
Yon rising moon, wi kindly beam,
Will licht me on my weary way.”


Ah ! Donald, wherefore bounds thy heart ?
Why beams wi joy thy wistfu e'e ?
Yon's but thy true love's fleeting form,
Thy true love mair thoult never see ;
Deep in the hollow glen she lies,
Amang the snaw, beneath the tree,
She soundly sleeps in Death's caul arms,
A victim to her love for thee.














About Read Raw


Read Raw Press


Featured Poet


Featured Author


The Rolling Poetry Page


The Rolling Prose Page








Market News